 |
 ᐹᓪ ᐅᑲᓕᖅ ᖃᕋᓴᐅᔭᒃᑯᑦ ᑐᕌᕈᑎᖓ ᑐᓴᕋᑦᓴᓂᒃ ᑎᒍᓯᒍᓐᓇᕐᓂᖅ ᐊᒻᒪᓗ ᑲᙳᓇᖅᑐᓕᕆᓂᖅ
|
ᑐᓐᖓᓱᒋᑦᑎ ᓄᓇᕗᒻᒧᑦ ᐊᕐᕌᒍᕋᓴᕐᓂᒃ ᑕᐅᓴᖏᓐᓂ ᓄᓇᕗᒻᒥᐅᑦ ᐃᓅᓕᓯᒪᒍᓐᓇᖅᓯᒪᔪᑦ ᓄᓇᕐᔪᐊᑉ ᖁᑦᓯᓂᖅᐹᖓᓂ. ᓄᓇᕗᑦ ᐊᖏᔪᒻᒪᕆᐊᓗᒃ ᐊᒻᒪᓗ ᑲᔾᔮᓇᖅᑐᓂ, ᑭᖑᓪᓕᖅᐹᖑᖃᑕᐅᔪᖅ ᓱᕈᖅᓯᒪᙱᑦᑐᓂ ᓄᓇᕐᔪᐊᕐᒥ. ᓄᓇᕗᑦ ᐊᑐᐃᓐᓇᖃᑦᓯᐊᕐᒥᔪᖅ ᐱᕕᖃᕐᕕᐅᔪᓐᓇᖅᑐᓂᒃ. ᑮᓇᐅᔭᓕᐅᕈᓐᓇᕐᓂᐊᕐᓂᕗᑦ ᓂᕆᐅᓇᑦᓯᐊᖅᑐᖅ ᐱᕈᖅᐸᓪᓕᐊᓂᐊᕐᓂᖓᓂᒃ ᐊᒻᒪᓗ ᓂᕆᐅᑦᑐᒍᑦ ᐱᕙᓪᓕᐊᓂᐊᕐᓂᖏᓐᓂᒃ ᐅᔭᕋᕐᓂᐊᖅᑐᓕᕆᓂᖅ, ᐃᖃᓗᓕᕆᓂᖅ, ᓴᓇᐅᒐᓕᕆᓂᖅ, ᐃᓕᖅᑯᓯᓕᕆᓂᖅ, ᑕᕐᕆᔭᓕᐅᖃᑦᑕᕐᓂᖅ, ᐊᒻᒪᓗ ᐳᓚᕋᑦᑐᓕᕆᓂᖅ ᐊᕐᕌᒎᓂᐊᖅᑐᓂ ᖁᓕᓂᒃ. ᓂᕆᐅᑦᓯᐊᖅᑐᒍᑦ ᑎᒍᓯᓂᐊᕐᓂᑎᓐᓂᒃ ᐊᐅᓚᑦᓯᔪᓐᓇᓂᕐᒥᒃ ᓄᓇᒦᓐᖔᖅᓯᒪᔪᓂᒃ ᐊᒻᒪᓗ ᓂᖏᖅᑕᕐᓂᐊᕐᓂᑎᓐᓂᒃ ᐊᑕᖏᖅᑐᒥᒃ ᐊᑑᑎᒋᑦᓯᐊᕈᓐᓇᕐᓂᐊᕋᑦᑎᒍ ᐱᕙᓪᓕᐊᔪᓕᕆᓂᒃᑯᑦ ᑮᓇᐅᔭᓕᐅᕈᑕᐅᔪᓐᓇᖅᑐᑦ ᐃᓄᖁᑎᑦᑎᓐᓄᑦ ᐊᒻᒪᓗ ᓄᓇᒦᙶᖅᓯᒪᔪᓄᑦ. ᐊᕕᑦᑐᖅᓯᒪᕕᖓ ᓄᓇᕗᑦ ᓴᖅᑭᖅᑕᐅᓯᒪᔪᖅ ᓄᓇᕗᒻᒥ ᓄᓇᑖᕐᓂᕐᒧᑦ ᐊᖏᕈᑎᑎᒍᑦ. ᓄᓇᕗᑦ ᒐᕙᒪᒃᑯᖏᑦ ᐊᒻᒪᓗ ᓄᓇᕗᑦ ᑐᙵᕕᒃᑯᑦ, ᐃᓄᓐᓂᒃ ᑭᒡᒐᖅᑐᐃᔩᑦ ᑲᑐᔾᔨᖃᑎᒌᑦ, ᐃᖅᑲᓇᐃᔭᖃᑎᒌᑦᑑᒃ ᓴᖅᑭᖅᐸᓪᓕᐊᒍᓐᓇᖁᓪᓗᒍ ᓇᒻᒥᓂᖅ ᒪᑭᑕᔪᓐᓇᕐᓂᖅ ᐊᒻᒪᓗ ᓴᐳᔾᔨᓯᒪᓇᓱᐊᕐᓂᕐᒧᑦ ᐱᔪᓐᓇᐅᑎᓂᒃ ᐊᒻᒪᓗ ᐱᕚᓪᓕᕈᑎᑦᓴᖏᓐᓂᒃ ᐃᓄᐃᑦ ᓄᓇᕗᒻᒥ. ᓯᕗᒧᒋᐊᕈᑎᖃᖅᑎᓪᓗᑕ ᐱᓕᕆᖃᑎᖃᖅᐸᓐᓂᐊᖅᑐᒍᑦ ᓄᓇᑖᕈᑎᐅᓯᒪᔪᓄᑦ ᑲᑐᔾᔨᖃᑎᑦᑎᓐᓂᒃ. ᒪᑐᐃᖓᑦᓯᐊᖅᑐᒥᒃ ᑐᓴᐅᒪᖃᑦᑕᐅᑎᖃᑎᖃᖅᐸᓪᓗᑕ ᓇᓗᙱᑦᑐᖓ ᑎᑭᐅᑎᔪᓐᓇᖅᓯᓂᐊᕋᑦᑎᒍ ᑐᕌᒐᕆᔭᕗᑦ -- ᐱᐅᓯᕚᓪᓕᖅᑎᑦᓯᓂᕐᒥᒃ ᐃᓅᓯᖏᓐᓂᒃ ᓄᓇᕗᒻᒥᐅᑦ ᓴᙱᓕᖅᐹᓪᓕᖅᑎᑦᓯᓂᒃᑯᑦ ᐃᓕᖅᑯᓯᑦᑎᓐᓂᒃ ᐊᒻᒪᓗ ᑮᓇᐅᔭᓕᐅᕈᑕᐅᒍᓐᓇᖅᑐᓂᒃ. ᐊᒥᓱᓂᒃ ᑮᓇᐅᔭᓕᐅᕈᑕᐅᔪᓐᓇᖅᑐᓂᒃ ᐱᑕᖃᖅᑐᒦᑦᑐᒍᑦ, ᐱᕈᖅᐸᓪᓕᐊᔪᑦ ᑮᓇᐅᔭᓕᐅᕈᑕᐅᔪᓐᓇᖅᑐᑦ, ᑲᔾᔮᓇᖅᑐᑦ ᓄᓇᐃᑦ ᐊᒻᒪᓗ ᐊᔾᔨᐅᙱᑦᑐᒥᒃ ᐃᓕᖅᑯᓯᖃᖅᑐᑕ ᐃᓇᑉᐸᒋᑦ ᐊᑐᖃᑦᑕᖁᓪᓗᒍ ᑖᓐᓇ ᖃᕆᓴᐅᔭᒃᑯᑦ ᑐᑭᓯᒋᐊᕐᕕᒃ ᐃᓕᓐᓂᐊᕈᑎᒋᓗᒍ ᖃᓄᖅ ᐃᓚᐅᖃᑕᐅᒍᓐᓇᕐᒪᖔᖅᐱᑦ ᒪᑭᑉᐸᓪᓕᐊᔪᒧᑦ ᑮᓇᐅᔭᓕᐅᕈᓐᓇᓂᑦᑎᓐᓄᑦ, ᐃᓚᐅᖃᑕᐅᓗᑎᓪᓗ ᐊᔾᔨᐅᙱᑦᑐᒧᑦ ᐃᓕᖅᑯᓯᑦᑎᓐᓄᑦ ᐊᒻᒪᓗ ᓱᕋᑦᓯᒪᙱᑦᑐᒧᑦ ᓄᓇᑦᑎᓐᓅᖅᓯᒪᓗᑎᑦ. ᓯᕗᓕᖅᑎ ᐹᓪ ᐅᑲᓕᖅ |